ڕوانگە - لە وتووێژی لەگەڵ تۆڕی میدیایی جام کوردی، لە بارەی ڕۆژی جیهانی قودس و ئەو زوڵمەی کە ڕژێمی ئیسرائیل دەرحەق بەخەڵکی فەڵەستین ئەنجامی دەدات، هەروەها ڕێگاچارەکانی بەردەم خەڵکی غەززە بۆ دەربازبوون لەو دۆخەی کە بەرۆکی گرتوون، مامۆستا مەلا سەردار سەعید، پێشنوێش و وتارخوێنی مزگەوتی ئەوبەکری سدیق لە قەزایی کەلار، ڕایگەیاند؛"
ئەوزوڵمەی کە ئیسرائیل بەرامبەر بە مسوڵمانانی غەززە ئەنجامی دەدات و ئەو بێڕێزیەی کە بەرامبەر بە قودس دەیکات، لەوانەیە ئیسرائیل بەتەنها خۆی نەبێت، بەڵکو پێدەچێت چەندین وڵاتی دیکەی زلهێزی جیهانی لەپشت ئەم زوڵم و ستەمەوەبێت، پێدەچێت بێدەنگی چەندین وڵاتی عەرەبی و ئیسلامیش هۆکاربێت بۆئەوەی تاوانێکی گەورەی لەوجۆرە بەرامبەر بە مسوڵمانانی فەڵەستین ئەنجام بدرێت.
مامۆستا مەلا سەردار سەعید، پێشنوێش و وتارخوێنی مزگەوتی ئەوبەکری سدیق لە قەزایی کەلار، ڕایگەیاند:" پەیامی ئێمە بۆ ڕۆژی قودس یەکەمیان پەیامی دڵخۆشی و شادومانییە کەوا پرسی قودس پرسێکە ڕۆژێکی تایبەتی بۆ تەرخانکراوە و بووە بە ڕۆژی جیهانی قودس، بەڵام لە لایەکی دیکەوە مایەی نیگەرانی و دڵتەنگییە کەوا پرسێکی ئاوا گەورە کەوا پرسێکی عەقیدەی زیاتر لە دوو ملیار مسوڵمانی سەر ڕووی زەوییە بچوککراوەتەوە بۆ تەنها ڕۆژێک لە ساڵێکدا. '
وتیشی:"پرسی قودس پرسێکی عەقیدەی و ئاینی و ئیسلامییە و دەبێت هەموو مرۆڤایەتی نەک تەنها مسوڵمانان، بەڵکو دەبێت هەموو مرۆڤایەتی بەگرنگی بزانن و لە ئاستی جیهاندا گرنگی و بایەخی تایبەتی پێبدرێت، بەڵام بەداخەوە ئەم پرسە لە ئاستی جیهاندا بچوککراوەتە بۆ ئاستی مسوڵمانان و لەو ئاستەشەوە بچوکتر کراوەتەوە بۆ ئاستی نەتەوەی عەرەب و لەو ئاستەشەوە بچوکترکراوەتەوە بۆ چەند حیزب و گروپ و تاقمێکی بچوکی ئەو شارە. '
مامۆستا مەلا سەردار سەعید ڕونیشیکردەوە:" جێگەی نیگەرانییە کەوا دەبێستین و دەبینین بە بەرچاوی جیهانەوە زوڵمێکی گەورە لەوشوێنە دەکرێت کەوا یەکەم قیبلە و ڕووگەی مسوڵمانانە و هیوادارین ئیدی کۆتایی بەو زوڵم و ستەم و ناڕەحەتیانە بهێنرێت کە بەرامبەر بەو خەڵکە دەکرێت. '
لەوەڵامی ئەو پرسیارەی کە ئایە پێتانوایە ئیسرائیل هەروا بەئاسانی دەستبەرداری ئەو زوڵم و ستەمەبێت کە بەرامبەر بە مسوڵمانانی فەڵەستین دەکرێت، یاخود بەپێچەوانە ئەم زوڵمە پلان بۆ داڕێژراوە و کاتێکی زیاتر بخایەنێت؟
ئەو مامۆستا ئاینیە ئەوەیشی خستەڕوو:"ئەوەی کە ئیسرائیل ئەنجامی دەدات لەوانەیە ئیسرائیل بەتەنها خۆی نەبێت و پێدەچێت چەندین وڵاتی دیکەی زلهێزی جیهانی لەپشت ئەم زوڵم و ستەمەوەبێت، پێدەچێت بێدەنگی چەندین وڵاتی عەرەبی و ئیسلامیش هۆکاربێت بۆئەوەی تاوانێکی گەورەی لەوجۆرە بەرامبەر بە مسوڵمانانی فەڵەستین ئەنجام بدرێت، هەروەها ئاماژەی بەوەشکرد، بێگومان هەر وڵاتێک کە شەڕ بکات و دژی هەر حیزب و لایەن و وڵاتێکی دیکە بێت هەوڵ بۆ بەدەستهێنانی بەرژەوەندیەکانی خۆی بدات وە کۆمەڵێک وڵاتی دیکەش بێدەنگبن لە ئاست ئەو زوڵمە ئەوا ئەوەپیشاندەدات کە ئەوانیش ترسیان لەوەیە بەرژەوەندی خۆیان بکەوێتە خەتەرەوە، بۆیە ئومێددەکەین ڕێکخراوە جیهانیەکان و کۆمەڵگای مەدەنی و ڕێکخراوەکانی مافی مرۆڤ و ئافرەتان و ڕێکخراوەکانی منداڵان بەدەنگ بێن و کۆتایی بەم زوڵم و ستەمە بێنن. '
مامۆستا مەلا سەردار سەعید، پێشنوێش و وتارخوێنی مزگەوتی ئەوبەکری سدیق لە قەزایی کەلار ئاشکرایشیکرد:"خەڵکی غەززە لە ئێستادا چەوساوەترین و بێدەسەڵاتترین میللەتن لەسەر ڕووی زەوید، باوەڕناکەم بتوانن ڕێگە چارەیەک بدۆزنەوە بۆ دەربازبوون لەو دۆخەی کە تێیکەوتوون، تەنها ئەوەندەهەیە قەدەریان لەژێر دەسەڵاتی خودا دایە و هەروەها لەژێر دەسەڵاتی ئەو وڵاتانەی جیهان و ناوچەکەدایە و چاوەڕێیی ئەوەن لەمەزیاتر زوڵمیان لێنەکرێت و بتوانرێت پێداویستیەکانیان پێبگات.'